O Día Internacional do LEGO chega á nosa biblioteca!

 Ola, olaaaa! 

Son Pingüi, a mascota máis curiosa e brincadeira da biblioteca do CRA de Oroso!

Hoxe veño contarvos algo que me fai bater as ás de emoción… celebramos o Día Internacional do LEGO! 

Neste día tan especial, a biblioteca énchese de cor, creatividade e imaxinación. Primeiro, faremos unha presentación moi divertida para descubrir xuntos e xuntas que son os LEGO: de onde veñen, como se xoga con eles, e cantas maneiras diferentes existen de construír, crear e inventar mundos novos.

Porque… atención, atención! 

Non sempre hai unha soa forma de xogar. Ás veces, cando miramos as pezas con outros ollos, aparecen ideas sorprendentes!

Despois, acomodarémonos ben cómodos e cómodas para gozar da lectura do conto, Non é unha caixa, de Antoinette Portis (Editorial Kalandraka).

Un libro marabilloso que nos lembra algo moi importante: a imaxinación transforma as cousas máis sinxelas en aventuras extraordinarias.

Tras a lectura, falaremos do conto, do que nos fixo sentir e da relación entre a historia e as pezas de LEGO. Porque, igual que no libro, unha peza pode ser moito máis do que parece: un coche, unha casa, un animal, un foguete… ou todo á vez!

E claro que si… chega o momento de xogar!

Imos tocar, coñecer e experimentar cos LEGO, descubrir a súa orixe, entender por que son tan importantes no xogo e na aprendizaxe, e deixarnos levar pola creatividade sen límites.

Desde a Pingüibiblio, convidámosvos a celebrar connosco este día cheo de construcións, historias e soños feitos con pezas pequenas… pero con imaxinación xigante.

Vémonos entre libros e LEGO!