Pequenas mans, grandes creacións nas Brañas de Valga

Na nosa visita ás Brañas de Valga, o alumnado do CRA de Oroso tamén puido viaxar no tempo a través dun fermoso e creativo obradoiro de barro.

Os nenos e nenas descubriron como, antigamente, o barro era un material esencial na vida cotiá das persoas da zona, empregado para facer tellas, ladrillos e outros elementos necesarios para construír fogares e dar forma ao día a día.

Coas súas propias mans, experimentaron a textura, a humidade e a maxia deste material natural, traballando con ilusión e moita creatividade. E como auténticos artesáns e artesás… crearon un ratiño moi especial de barro.

Cada figura foi única, feita con esforzo, imaxinación e entusiasmo. Ver as súas caras ao modelar, crear e descubrir foi, sen dúbida, un dos momentos máis bonitos da xornada.

Actividades coma esta axudan ao alumnado a comprender o valor dos oficios tradicionais, a importancia dos recursos naturais e o pracer de aprender facendo, tocando e experimentando.

Grazas por ofrecernos experiencias que unen historia, natureza e emoción. Seguimos medrando a través das vivencias que deixan pegada.