Nova cita ná biblioteca… e xa cheira a primavera!

O 17 de marzo temos unha nova aventura lectora na biblioteca escolar do CRA de Oroso. Esta vez mergullarémonos nun conto que leva décadas facendo voar a imaxinación de millóns de nenos e nenas:

“Unha eiruga moi larpeira” de Eric Carle

Un clásico da literatura infantil que convida a descubrir algo marabilloso: como da vida máis pequena pode xurdir unha transformación sorprendente.

Un pequeno ovo
Unha eiruga con moita fame
Moita comida polo medio
Un casulo
…e finalmente unha fermosa bolboreta!

Este conto é moito máis que unha historia divertida. É unha porta para aprender sobre a natureza, o paso do tempo, o crecemento e os ciclos da vida, algo que conecta moi ben coa curiosidade do noso alumnado de infantil e primeiros cursos de primaria.

Ademais, Eric Carle é coñecido en todo o mundo polas súas ilustracións únicas, feitas con colaxes de papeis pintados, que enchen os seus libros de cor, textura e emoción. As súas historias axudan aos máis pequenos a descubrir o mundo a través da arte, da ciencia e da imaxinación.

Nesta sesión, ademais da lectura do conto, prepararemos unha actividade súper mega divertida.

Porque si…
 a primavera xa se empeza a sentir no aire,
nas plantas que medran,
nos pequenos animais que espertan…
e tamén nas historias que florecen na nosa biblioteca.

Así que preparádevos… porque o 17 de marzo a nosa biblioteca volverá encherse de contos, sorpresa e moita maxia lectora.

Quen sabe… igual algunha pequena eiruga tamén comeza a transformarse entre as páxinas dun libro.

Pequenas científicas e científicos… facendo estatística!

No noso cole, o tempo tamén se estuda… e con moita curiosidade! O alumnado convertéronse en auténticos observadores e observadoras do tempo atmosférico.

Cada día anotaron se facía sol, choiva, vento, frío, saraiba, nubrado… rexistrando a información en táboas de datos elaboradas por eles e elas mesmas. Despois chegou a parte máis emocionante: interpretar os resultados.

Contaron cantos días choveu
Compararon cantos días fixo sol
Fixeron cálculos matemáticos
Pensaron, analizaron e sacaron conclusións

Deste xeito, o alumnado iníciase de forma manipulativa, visual e significativa na estatística, unha das competencias matemáticas fundamentais.

Esta experiencia conecta directamente co currículo de Educación Infantil e Primaria, especialmente co desenvolvemento de:

Pensamento matemático e lóxico
Recollida, organización e interpretación de datos
Observación do medio natural
Comunicación de resultados e conclusións

Aprender matemáticas así significa investigar, observar o mundo e facer preguntas. Porque a estatística non é só números… tamén é comprender o que pasa ao noso arredor.

No noso CRA seguimos apostando por unha aprendizaxe activa, innovadora e conectada coa realidade, onde cada día pode converterse nunha pequena investigación científica.

Porque ás veces… mirar ao ceo tamén é facer matemáticas. 

Un éxito cheo de preguntas na Pingüibiblio do CRA de Oroso!

Vivimos unha sesión moi especial na nosa biblioteca escolar. Co gallo do Día Internacional de Facer Preguntas, a Pingüibiblio encheuse de curiosidade, risas e moitas ganas de descubrir o mundo a través das preguntas.

E temos que dicilo: foi todo un éxito! 

Todo comezou cun pequeno misterio… as preguntas escaparan dos libros! 
O noso alumnado tivo que axudarnos a atopalas e, pouco a pouco, fomos descubrindo que preguntar é unha das mellores maneiras de aprender.

Durante a sesión compartimos dúas historias marabillosas:

 A que sabe a lúa? de Michael Grejniec,  que nos fixo pensar sobre a cooperación, a curiosidade e o valor de intentar alcanzar os nosos soños xuntos e xuntas.

De que cor é un bico? de Rocio Bonilla, un conto cheo de emocións, cores e imaxinación.

A partir destes libros xurdiron conversacións, ideas e moitas preguntas que conectan co mundo da lectura e da escritura, pero tamén co pensamento lóxico e matemático: observar, comparar, imaxinar respostas, facer hipóteses e compartir opinións.

Na nosa escola cremos firmemente que a biblioteca é moito máis ca un lugar para ler:
é un espazo onde nacen preguntas, medran ideas e constrúense aprendizaxes para toda a vida. 

Queremos compartir coas nosas familias —e tamén coas futuras familias que buscan unha escola viva, curiosa e innovadora— que actividades como esta forman parte do noso día a día: propostas que espertan a curiosidade, fomentan o pensamento e fan do aprender unha verdadeira aventura.

Porque na Pingüibiblio do CRA de Oroso sabemos algo moi importante: cada pregunta abre unha porta ao coñecemento.

Visita de Antía García

 Querida Antía García,

No CRA de Oroso queremos darche as grazas de corazón pola túa visita e pola marabillosa charla que compartiches co noso alumnado. Foi unha experiencia na que aprendemos que o fútbol tamén se escribe en feminino, e que as mulleres teñen un papel fundamental dentro do deporte, tamén como árbitras.

No marco do Día da Muller, a túa presenza recórdanos que cada paso que dás no campo tamén abre camiño para moitas outras.

Grazas por ensinarnos tanto e por demostrar que o talento, o esforzo e a ilusión non teñen límites.

Con todo o noso cariño,
O alumnado e profesorado do CRA de Oroso 

8M no CRA de Oroso: Senlleiras Deportistas

No CRA de Oroso celebramos o Día Internacional da Muller cun proxecto moi especial: “Senlleiras Deportistas”, unha proposta de Aprendizaxe Servizo (ApS) coa que o noso alumnado investigou, descubriu e puxo en valor a traxectoria de grandes deportistas galegas.

Nas aulas coñecemos historias de superación, esforzo e talento de mulleres como Sara Gacio Cendal, Valeria Batire Guridi, Vicky Alonso, Teresa Abelleira, Adiaratou Iglesias, Teresa Portela, Judith Rodríguez e Susana Rodríguez. Mulleres que, desde diferentes disciplinas deportivas, acadaron grandes logros e se converteron en referentes para as novas xeracións.

O alumnado elaborou pósteres sobre deportistas galegas de distintas localidades, co obxectivo de dar a coñecer as súas carreiras e visibilizar o papel das mulleres no deporte.

Ademais, analizamos novas sobre deporte feminino, reflexionando sobre a realidade das mulleres deportistas e valorando as súas traxectorias profesionais máis alá das medallas e competicións.

Moi pronto poderedes ver os pósteres nunha exposición nas escolas do CRA.
Mentres tanto, xa podedes descubrir as novas elaboradas polo alumnado nesta páxina:

https://sites.google.com/view/senlleirasdeportistas/senlleiras-deportistas?authuser=0

Animádevos a entrar na ligazón e ler o traballo do noso alumnado!

Porque educar tamén é crear referentes, abrir camiños e dar visibilidade ás mulleres que inspiran. 

Un agasallo feito con todo o corazón

Dende o noso cole estivemos encantados de preparar este agasallo de agradecemento para as persoas do Fogar Residencial Porto Vieira. POR FIN O IDES COÑECER!

Foi a nosa maneira de dicir GRAZAS pola vosa participación, pola vosa creatividade e pola vosa ilusión. 

Esperamos de todo corazón que desfrutásedes moitísimo vendo este vídeo, tanto como nós desfrutamos preparándoo.

As persoas maiores sodes unha parte fundamental da nosa comunidade e para o noso alumnado é unha sorte poder compartir momentos, aprendizaxes e emocións convosco 

Grazas por tanto.
Seguimos camiñando xuntos e Xuntas.

ALERTA NA PINGÜIBIBLIO!

Algo moi misterioso pasou na biblioteca do CRA de Oroso…

ESCAPARON AS PREGUNTAS DOS LIBROS!

Agora están agochadas por toda a biblioteca e o noso alumnado terá que axudarnos a atopalas…

Para que serven os libros?
A que sabe a lúa?

De que cor é un bico?
Os peixes teñen sede?
Quen apaga as estrelas pola mañá?

Este martes 10 celebraremos o Día Internacional de Hacer Preguntas xogando, lendo e imaxinando na nosa Pingüibiblio.

Historias que nacen dunha pregunta, como A que sabe a lúa?  ou De qué cor é un bico?  axudarannos a descubrir algo moi importante:

Preguntar é a mellor forma de aprender.

Porque cada pregunta…
abre unha porta
acende unha idea
e pode cambiar o mundo.

Podedes aprobeitar para xogar un pouco antes de que escapen tamén das escolas!