Nestes días nos que Galicia estivo baixo alerta laranxa, vermella e amarela, o alumnado do CRA de Oroso estivo moi atento ao que acontecía na nosa contorna. A través dos medios de comunicación, especialmente dos informativos, puideron coñecer de primeira man os sucesos que se estaban a producir en toda a nosa comunidade.
Nas aulas seguimos a actualidade, observamos mapas do tempo, escoitamos as recomendacións dos servizos de emerxencia e comprendemos por que é tan importante estar ben informados cando se dan situacións especiais.
Ademais, o alumnado puido ver como nevaba no Cebreiro en directo, achegándose así a realidades doutros puntos do país sen saír da escola.
Estas experiencias axúdannos a traballar desde idades temperás a importancia de informarse a través de diversas fontes que poidan ser fiables, contrastadas e veraces, entendendo que os medios de comunicación cumpren un papel fundamental para coñecer o mundo que nos rodea e tomar decisións responsables.
Porque educar tamén é aprender a escoitar, observar, comprender e informarse ben.
Ningún comentario:
Publicar un comentario