Neste mes tan especial, os nenos e nenas do CRA de Oroso saíron polos camiños e sendas da nosa contorna para recoller flores, xestas, codesos, herbas e pequenos tesouros da natureza.
Coas súas mans, ilusión e traballo en equipo, deron vida ao seu Maio na escola, mantendo viva unha das tradicións máis fermosas da nosa terra.
Cantar, crear, compartir e aprender xuntos fixo desta celebración unha experiencia inesquecible chea de cor, natureza e identidade galega.
Agora despedimos maio… pero xuño xa chama á porta cargado de novas aventuras, descubrimentos e emocións por vivir no CRA!
Queres un vídeo para reflexionar e descarsar?. No noso paseo polo Acuario do Grove descubrimos que a natureza tamén pode ser unha gran compañeira para a relaxación.
Un pequeno momento de calma con música jazz, miradas curiosas e animais mariños que nos invitan a soñar.
Os nenos e as nenas coidaron con mimo as plantas de amorodos, observando cada flor, cada folliña e cada froito medrar pouco a pouco baixo o sol da primavera.
E chegou o momento máis esperado… a colleita!
Amorodos deliciosos, doces e saborosos que remataron na nosa merenda escolar… porque non hai sabor máis rico ca o do traballo feito con agarimo, paciencia e respecto pola natureza.
No CRA aprendemos que a terra cóidase, síntese e sabórease. A través do programa Voz Natura seguimos sementando conciencia ambiental, hábitos saudables e experiencias inesquecibles que medran ao ritmo da natureza.
Porque ás veces as mellores aprendizaxes… tamén saben a amorodo!
Throughout this school year, Jamie has not only been our language assistant, but also a colleague, a friend, and a truly important part of our school family.
With his joy, patience, kindness, and enthusiasm, he made learning English even more fun, exciting, and meaningful for both students and teachers.
Thank you, Jamie, for every game, every conversation, every smile, and every moment shared with us. We feel very lucky to have had you with us this year.
CRA de Oroso will always be your home. We will miss you so much!
Despois de coidar, regar e ver medrar os produtos da horta escolar, chegou un dos momentos máis agardados: preparar unha deliciosa ensalada cos froitos recollidos polos propios nenos e nenas do CRA de Oroso.
Con moita ilusión, pequenas mans convertéronse en grandes cociñeiras e cociñeiros, lavando, cortando e mesturando ingredientes cheos de sabor, aprendizaxe e esforzo.
E o mellor chegou ao final... sentarnos xuntos para degustar o resultado do noso traballo. Cada bocado sabía a natureza, cooperación e satisfacción polo camiño percorrido.
Porque non hai receita máis especial ca aquela que nace do esforzo compartido, do respecto pola terra e da alegría de aprender facendo.
Premede no vídeo e descubríde como elaboramos esta saborosa ensalada que nos fixo relamber a todos e todas!
O alumnado do CRA de Oroso viviu unha inesquecible excursión de fin de curso chea de descubrimentos, aprendizaxes e momentos máxicos.
A nosa aventura comezou no Acuario do Grove, onde puidemos coñecer de preto diferentes especies de animais e plantas mariñas propias do noso litoral. As nenas e os nenos observaron con curiosidade a riqueza do mundo mariño galego e quedaron fascinados coas sorprendentes esculturas elaboradas con materiais recollidos do mar, unha fermosa mostra de creatividade, sustentabilidade e respecto polo medio ambiente.
A continuación, embarcamos nun catamarán para navegar polas augas da ría e descubrir o fascinante mundo das bateas. Durante o percorrido aprendemos como se cultivan os mexillóns, observamos a vida mariña do entorno e gozamos da inmensa beleza da paisaxe mariñeira que nos rodeaba.
Pola tarde, a maxia fíxose realidade na Aldea dos Grobits, na Illa da Toxa. Entre recunchos sorprendentes, xogos e escenarios cheos de fantasía, o alumnado percorreu cada espazo buscando seres máxicos agochados entre as árbores, as casas e os camiños. A ilusión, a imaxinación e as ganas de descubrir acompañáronnos durante toda a visita.
Foi unha xornada chea de sorrisos, aventuras, convivencia e aprendizaxes que quedarán para sempre na memoria de todas e todos.
Porque ás veces, as mellores leccións apréndense fóra da aula, compartindo experiencias, explorando o mundo e creando recordos inesquecibles xuntos e xuntas.
As pequenas mans do noso alumnado volveron demostrar que, cando se traballa con ilusión, paciencia e agarimo, a natureza regálanos momentos inesquecibles
Despois de semanas coidando, observando e aprendendo, os nenos e as nenas realizaron o transplante de novas plantas e recolleron os primeiros froitos da nosa horta escolar. Unha chea de sorrisos enchendo este recuncho tan especial do cole.
Cada semente plantada converteuse nunha oportunidade para aprender a respectar a terra, valorar o esforzo e comprender a importancia de coidar o noso planeta.
Unha experiencia viva que mestura emocións, aprendizaxe, traballo cooperativo e sustentabilidade, facendo realidade os valores do programa Voz Natura.
E isto… aínda non rematou!
Cos produtos recollidos elaboraremos unha receita moi especial que pronto compartiremos con toda a comunidade educativa nas nosas redes sociais. Estade moi atentos/as!
No CRA de Oroso seguimos dando voz ao planeta, aprendendo desde a experiencia, o compromiso e o amor pola natureza.
As mochilas están preparadas, as ganas medran por momentos e os sorrisos xa anuncian unha xornada inesquecible chea de aventuras, xogos, amizade e moitísimas emocións.
Imos aproveitar o bo tempo para rir, descubrir, compartir e pasalo SUPERBEN entre compañeiras e compañeiros nun entorno marabilloso. Porque aprender tamén é vivir experiencias, crear recordos e desfrutar da natureza e da convivencia.
O alumnado do CRA está emocionadísimo por esta saída tan especial… e nós tamén!
A nosa biblioteca medra con historias cheas de emocións, aventuras e aprendizaxes… e hoxe queremos dicir un ENORME GRAZAS!
Desde o CRA de Oroso queremos agradecer de corazón á ANPA Reviravoltas a súa fermosa doazón de libros para a nosa biblioteca escolar.
Moitas historias agardan polas pequenas mans lectoras que as descubrirán cada día.
Cada libro é unha porta aberta á imaxinación, á igualdade, á aventura, á curiosidade e aos soños. Grazas por axudar a encher a nosa biblioteca de palabras que educan, emocionan e fan medrar.
Porque cando escola e familias camiñan da man… créanse espazos máxicos onde ler tamén é querer.
Mil grazas, ANPA Reviravoltas, por sementar lectura, ilusión e futuro no noso CRA!
Miles de nenos e nenas precisan algo máis ca un lugar onde estar: necesitan un fogar onde sentirse seguros, escoitados e queridos.
O acollemento familiar é unha oportunidade para ofrecer acompañamento, estabilidade e esperanza a crianzas e adolescentes que atravesan situacións difíciles.
O vindeiro 29 de maio ás 17:00 h, no Centro Cultural Fernando Casas Novoa de Oroso, teremos unha charla informativa sobre o acollemento e o sistema de protección da infancia e adolescencia da man de ACOUGO.
Un encontro para resolver dúbidas, coñecer experiencias e descubrir como pequenas accións poden transformar vidas.
Servizo de conciliación corresponsables dispoñible.
Oroso
29 de maio
17:00 h
Porque ás veces… abrir a porta dun fogar é abrir unha nova oportunidade de vida.
No CRA de Oroso aprendemos coas mans… e tamén coa curiosidade!
Os nenos e as nenas convertéronse estes días en auténticos científicos e científicas experimentando coa masa, o volume e a capacidade dos obxectos e dos líquidos. A través de probas, comparacións, medicións e observacións, descubriron que as matemáticas e a ciencia están presentes en todo o que nos rodea.
Con vasos medidores, balanzas improvisadas, recipientes e materiais diversos, o alumnado investigou, formulou hipóteses, comprobou resultados e aprendeu a pensar de maneira crítica e creativa. Porque aprender non é repetir… é descubrir!
Estas experiencias favorecen o desenvolvemento da competencia matemática, científica e tecnolóxica desde idades temperás, mediante metodoloxías activas, manipulativas e innovadoras que sitúan ao alumnado como protagonista da súa propia aprendizaxe.
No CRA de Oroso apostamos por unha educación que prepara para o futuro, fomentando habilidades fundamentais para a vida persoal, educativa e laboral: resolver problemas, investigar, cooperar, tomar decisións e comprender o mundo con mirada científica.
Porque detrás de cada experimento nace unha pregunta… e detrás de cada pregunta pode estar o futuro dunha gran científica ou dun gran inventor.
As escolas de Trasmonte e Deixebre do CRA de Oroso viviron unha xornada inesquecible da man de Alberto e dos seus compañeiros, que nos visitaron para compartir unha sesión moi especial de educación viaria dentro do programa de mobilidade sostible e segura.
Ao longo da actividade aprendemos cuestións moi importantes para o noso día a día: respectar os sinais, cruzar correctamente polos pasos de peóns, viaxar ben sentados nos vehículos e movernos pola rúa con responsabilidade e seguridade.
Pero o mellor chegou despois… trouxeron dúas impresionantes motos da DXT que deixaron ao noso alumnado coa boca aberta! Puidemos velas de preto, descubrir como funcionan e vivir unha experiencia emocionante e moi divertida.
Aprender tamén pode ser unha aventura chea de emocións, sorrisos e grandes momentos compartidos.
Queremos darlles as grazas a Alberto e aos seus compañeiros pola súa cercanía, cariño e profesionalidade, así como á DXT e á Xefatura Provincial de Tráfico da Coruña por facer posible unha actividade tan enriquecedora para o noso alumnado.
Mil grazas por axudarnos a medrar en seguridade e responsabilidade!
Na biblioteca do CRA de Oroso os caracois deixaron pegada… e tamén moitas emocións!
Celebramos unha actividade moi especial arredor da lectura do conto “Caixa Caracois”, de Armando Quintero e André Letria, da editorial OQO. Unha historia delicada e emocionante que nos falou da amizade, da beleza interior e da importancia de querernos tal e como somos.
“—É que son feo…
—Pois a min non mo pareces.”
Unha frase pequena… pero cun corazón enorme.
Durante a actividade, as nenas e nenos escoitaron con atención, compartiron sentimentos, opinións e reflexións sobre os personaxes e descubriron que cada caracol é único… igual ca nós.
E despois chegou a parte máis creativa!
Cada alumno e alumna deseñou o seu propio caracol, cheo de cores, personalidade, imaxinación e alegría.
A biblioteca converteuse nun espazo de calma, creatividade e emocións compartidas, onde ler tamén significa sentir, expresarse e medrar en equipo.
Grazas ás nosas pequenas e pequenos artistas por participar tan ben e por encher a biblioteca de fantasía e tenrura.
Estás interesado ou interesada en solicitar as axudas de libros de texto e material escolar da @xuntagal para o próximo curso?
En pouco máis dun minuto, contámosche como facelo
Lembra: do 19 de maio ao 19 de xuño
Do 19 de maio ao 19 de xuño, podedes solicitar as axudas de libros e material escolar para o vindeiro curso
Para rendas iguais ou inferiores a 10.000€ per cápita
Préstamo de libros do fondo
Axudas á compra de libros
Vales para adquisición de material
Lembra que para rendas de máis de 10.000€ e ata 30.000€ per cápita podedes beneficiarvos da dedución fiscal na declaración da renda
No CRA de Oroso tivemos a sorte de recibir a visita de Quico e Luís, dous expertos en educación viaria que achegáronse ás escolas de Vilacide e Senra para ofrecernos unha formación moi especial dentro do programa Proxecta.
Durante a sesión aprendemos moitísimo sobre educación viaria: como funcionan os semáforos, a importancia dos pasos de peóns, como debemos ir correctamente sentados nos vehículos ou como debemos camiñar con seguridade pola calzada e respectar as normas de circulación.
Despois da parte teórica chegou o momento de poñer en práctica todo o aprendido cun circuíto de educación viaria preparado especialmente para nós. E, como gran sorpresa… trouxeron unha motocicleta da Garda Civil de Tráfico na que mesmo puidemos montar!
Foi unha experiencia moi divertida, emocionante e chea de aprendizaxes que nos axudan a medrar como peóns responsables e seguros.
Queremos agradecer á DXT e á Xefatura Provincial de Tráfico da Coruña a súa colaboración e implicación nesta formación tan importante para o noso alumnado.
Ola, olaaa! Son Pingüi… e veño máis lento do normal porque… estou rodeado de CARACOIS!
Atención, atención! O vindeiro 19 de maio, a biblioteca escolar do CRA de Oroso converterase nun auténtico caracolódromo lector!
Celebramos o Día dos Caracois cunha actividade de animación lectora chea de humor, contos, curiosidades e baba… digo… maxia!
Sabíades que os caracois: teñen casa portátil? poden durmir durante moooito tempo? e deixan un camiño brillante coma se fosen estrelas da biblioteca?
Eu xa lles preguntei se len contos… e un respondeume: — “Vou moi amodo porque estou na parte máis emocionante!”
E outro díxome: — “Non corro… que despois pérdome as ilustracións!”
Na biblioteca aprenderemos: como coidalos con cariño que comen por que necesitan humidade e como facerlles un pequeno fogar respectando sempre a natureza
Tamén haberá contos, sorpresas e algunha misión secreta de Pingüi…
Ollo a: “CARACOIS” de Armando Quintero e André Letria. OQO Editora
Así que preparade as antenas, afiade os ollos curiosos e… vide á biblioteca sen présa… que os caracois xa nos están esperando!
As Letras Galegas tamén se sementan no rural… e no CRA de Oroso florecen cada día.
Celebramos moito máis ca unha data. Celebramos a nosa lingua, as historias que nos unen, as palabras que herdamos das nosas avoas e avós, os cantares, os contos ao carón do lume e a maneira tan nosa de entender o mundo.
No CRA de Oroso as Letras Galegas viven nas pequenas conversas da aula, nos xogos compartidos, nas lecturas da biblioteca, nas cancións, nas emocións e na ilusión das nosas crianzas. Porque cada nena e cada neno que fala, canta, crea e soña en galego está axudando a construír futuro.
Defender o galego é coidar da nosa identidade, da nosa cultura e das raíces que nos sosteñen. E facelo desde a escola rural é un orgullo inmenso, porque aquí aprendemos que as palabras tamén abrazan, acompañan e transforman.
Neste Día das Letras Galegas 2026 queremos darlles voz ás emocións, á memoria e á esperanza. Que nunca deixemos de falar a lingua que nos fai sentir na casa.
Queredes apreciar o proceso creativo arredor do Día das Familias?
Pouco a pouco, entre ideas, conversas, pinturas, palabras bonitas e moita ilusión, fomos dando forma ás nosas postais poéticas e ás bolsas familiares conmemorativas.
O profesorado acompañou, guiou e colaborou en cada paso desta creación, axudando a transformar as ideas do alumnado en detalles únicos e cheos de significado. Pero foron elas e eles quen puxeron a esencia máis importante: a súa creatividade, a súa emoción e a maneira na que soñaban que sería este agasallo para as súas familias.
Cada debuxo, cada palabra e cada pequeno detalle naceu das súas mans e dos seus corazóns, pensando nas persoas ás que máis queren. O resultado? Un regalo sincero, auténtico e cargado de amor.
Porque cando escola e alumnado crean xuntos desde o cariño… suceden cousas realmente especiais.
No CRA de Oroso celebramos hoxe algo moi especial: o amor que nos abraza, os coidados que nos acompañan e os fogares onde medramos felices sendo nós mesmos e mesmas.
As nosas aulas enchéronse de palabras bonitas, apertas sinceiras e corazóns emocionados mentres falabamos da diversidade de familias que existen no mundo: grandes e pequenas, con mamá e papá, con dúas mamás, dous papás, avoas, avós, familias adoptivas, reconstruídas, multiculturais… Porque cada familia é única e especial, e todas teñen algo marabilloso en común: o cariño verdadeiro.
O noso alumnado preparou con moitísimo mimo unhas bolsas conmemorativas e unha tarxeta poética chea de tenrura para regalar ás súas familias. Un detalle nacido das súas mans pequenas pero dos seus corazóns enormes.
Falamos tamén da importancia de sentirnos queridos, escoitados, valorados e felices no noso núcleo familiar, sexa cal sexa a súa forma. Porque non hai un único modelo de familia, pero si algo imprescindible en todas elas: o respecto, o amor, os coidados e a felicidade compartida.
E hoxe marcharon para a casa súper felices, con orgullo e ilusión por poder entregar un agasallo feito por eles e elas mesmos/as ás persoas que máis queren no mundo.
Porque as familias son refuxio, raíces, ás, calorciño, complicidade, fogar e amor sen medida. Grazas por acompañarnos cada día no camiño de medrar xuntos e xuntas.
Din que un bosque perdeu todas as súas cores. As árbores quedaron apagadas, os camiños sen brillo e os seres máxicos agocháronse entre o silencio e a néboa…
Mais hoxe, as nosas nenas e nenos convertéronse en auténticas exploradoras e exploradores da fantasía para resolver un gran misterio.
Coa axuda das pistas agachadas tiveron que superar un reto moi especial: atopar o libro secreto capaz de devolverlle a maxia ao bosque. Buscaron entre estantes, contos e recunchos ata descubrir finalmente “Os manteis roubados”, de Marta Rivera Ferner. E foi entón cando a aventura comezou de verdade…
A través da lectura descubrimos fadas, trasnos, bruxas e criaturas fascinantes que nos fixeron entender que os libros teñen un poder inmenso: o de devolver a cor á imaxinación, á amizade e aos soños
Inspirándonos tamén no universo máxico de Morgana en Esmelle, da autora homenaxeada nas Letras Galegas 2026, Begoña Caamaño, falamos da maxia que habita nos libros e da importancia de seguir creando historias en galego que nos fagan sentir, pensar e imaxinar.
E como os bosques fantásticos precisan vida… tamén construímos seres marabillosos capaces de convivir nese novo mundo cheo de cor, respecto e ilusión.
Houbo risas, misterio, creatividade e moita emoción nunha tarde na que os libros volveron demostrar que poden cambiar calquera paisaxe… incluso aquelas que parecían perder toda a súa luz.
A tarde do martes 12 de maio, na nosa Pingüibiblioteca, abrimos as portas dun bosque cheo de misterio, maxia e emocións coa lectura de “Os manteis roubados”, de Marta Rivera Ferner, publicado por Everest Galicia.
Entre fadas, trasgos, bruxas e un sabio caracol, descubriremos unha historia que nos fala da importancia de coidar o que é de todas e todos, da colaboración e da intelixencia para resolver os problemas sen perder a esperanza. Os fermosos manteis de liño das fadas converteranse nunha gran pista para descubrir quen anda a sementar o desacougo no bosque… Coidado porque na nosa biblioteca pode pasar algo parecido…
Nesta tarde de animación lectora tamén queremos lembrar con cariño a figura de Begoña Caamaño, unha autora que dedicou a súa vida a dar voz ás historias, ás mulleres e á cultura galega. Porque cada conto que lemos en galego axúdanos a manter viva a nosa lingua, a nosa imaxinación e a nosa maneira de mirar o mundo.
Na biblioteca do CRA seguimos soñando, lendo e medrando xuntas e xuntos… porque ás veces un conto é moito máis ca un conto: é unha porta aberta á fantasía, á reflexión e á identidade.
Agárdovos entre libros, palabras e un chisquiño de maxia!
Atención, familias! Pingüi ten algo moi importante que anunciar…
O alumnado do CRA de Oroso xa pode dicir ben alto que conseguiu superar con éxito a gran formación de bombeiras e bombeiros no Parque de Bombeiros da Coruña!
A xornada comezou cunha completísima fase teórica na que aprendemos como é realmente o traballo destes heroes e heroínas da nosa sociedade.
Descubrimos cales son as súas funcións, como axudan ás persoas en situacións de emerxencia, que tipo de roupa e protección utilizan segundo cada intervención, os materiais cos que traballan e os distintos vehículos que existen dentro dun parque de bombeiros .
O alumnado quedou fascinado coñecendo os enormes camións de bombeiros, os coches de intervención, os vehículos especiais e mesmo outros medios preparados para actuar con rapidez e seguridade.
Pero a aventura non remataba aí…
Despois chegou a gran fase práctica!
Primeiro tiveron que demostrar as súas habilidades físicas, traballando o equilibrio, a coordinación e a capacidade para actuar en equipo, igual que fan os bombeiros e bombeiras cada día.
E despois… chegou o momento máis esperado!
As nenas e os nenos puideron subir aos camións, descubrir como funcionan as escaleiras, utilizar as mangueiras e experimentar de preto moitos dos materiais reais empregados nas intervencións.
As caras de emoción, as risas e a ilusión acompañaron cada actividade dunha experiencia que dificilmente esquecerán.
No CRA de Oroso estamos enormemente agradecidos ao Parque de Bombeiros da Coruña por ofrecernos esta formación tan enriquecedora, cercana e chea de aprendizaxes para a vida.
Grazas por ensinar con tanta paciencia, profesionalidade e cariño o valor da axuda, da prevención, do esforzo e do traballo en equipo.
E agora si… podemos anuncialo oficialmente!
TODO O ALUMNADO SUPEROU AS PROBAS!
Así que, dende hoxe… no CRA de Oroso xa temos novas bombeiras e novos bombeiros preparados para coidar, axudar e protexer aos demais.
Unha experiencia inesquecible que xa están desexando repetir algún día.
