A nosa sesión de animación á lectura estivo adicada ao fascinante mundo das caricaturas e dos debuxos animados. E vaia se o pasamos ben!
Comezamos cun reto moi especial: descubrir que persoas caricaturizadas pertencían ao noso claustro de profesorado. O alumnado converteuse en auténticos e auténticas detectives da biblioteca, observando pistas, expresións, detalles e… algunhas “orellas sospeitosamente coñecidas”.
Despois chegou un dos momentos máis divertidos da xornada: un xogo sobre caricaturas e personaxes animados que nenos e nenas coñecen a través da televisión e dos medios tecnolóxicos. Bob Esponxa, Patrulla Canina e moitos outros personaxes acompañáronnos nunha actividade chea de memoria, humor e participación.
Ademais, tivemos a oportunidade de coñecer mellor a obra do debuxante e humorista gráfico galego Luis Davila, coñecido como *O Bicheiro*. Leva décadas publicando viñetas humorísticas en *Faro de Vigo*. O seu traballo destaca por retratar con humor e retranca a vida cotiá de Galicia, especialmente o mundo do mar, o rural e as tradicións galegas. As súas viñetas conectan coa xente porque reflicten situacións próximas, reais e cheas de identidade galega.
Na Pingüibiblio seguimos descubrindo que ler tamén é observar, rir, investigar, crear e compartir
Ningún comentario:
Publicar un comentario