O martes vivimos na biblioteca escolar do CRA de Oroso unha xornada inesquecible, chea de emoción, curiosidade e moitísimas ganas de aprender.
O noso alumnado converteuse por unhas horas en auténticos investigadores e investigadoras, capaces de descifrar mensaxes secretas, comunicarse con mímica, escribir os seus nomes en código Morse e descubrir como se falaba a distancia… moito antes dos móbiles e da internet!
Foi unha experiencia marabillosa na que non faltaron as risas, o traballo en equipo e esas caras de sorpresa que tanto nos gustan ver cando aprenden xogando.
Nesta aventura tamén nos acompañaron dous libros moi especiais: Contos por teléfono, que nos achegou ao fascinante mundo do teléfono, e Invento, inventores e ideas xeniais, que nos abriu a porta para coñecer mellor o telégrafo e os grandes inventos que cambiaron a historia.
Descubrimos así que o telégrafo podería ser o avó da internet, e o teléfono o seu pai, porque grazas a eles comezou o soño de comunicar persoas que estaban lonxe.
E como broche final… o alumnado marchou feliz e moi ilusionado co agasallo recibido. Un detalle que gardarán con cariño para lembrar esta gran misión secreta na biblioteca.
Porque cando entramos na biblioteca… nunca sabemos a aventura marabillosa que nos está esperando.
Ningún comentario:
Publicar un comentario